II SHOW CIENTÍFICO 4 DE XUÑO

 

O II Show Científico enche de ciencia o VII Congreso EDUCODS

O pasado 4 de xuño, ás 17:30 horas, a Sala Camilo José Cela de Tui acolleu o II Show Científico do noso Club de Ciencia, unha das actividades máis esperadas do VII Congreso EDUCODS. Foi unha tarde moi especial na que o noso alumnado tivo a oportunidade de converterse en auténtico divulgador científico, compartindo os seus experimentos con familias, profesorado, compañeiros e veciños da comunidade educativa.

A xornada tivo un significado aínda máis especial porque, durante a mañá, diferentes centros educativos de Tui compartiron no Congreso as iniciativas, proxectos e experiencias científicas que desenvolveron ao longo do curso nos seus Clubs de Ciencia e noutros programas de innovación educativa. Foi unha magnífica oportunidade para coñecer o traballo doutros centros, intercambiar ideas e comprobar como a ciencia é unha ferramenta para aprender, crear e colaborar.

Xa pola tarde chegou o momento do noso espectáculo. Os diferentes grupos presentaron os experimentos que prepararon durante semanas de ensaios e traballo cooperativo. O público sorprendeuse coa lámpada de lava, descubriu como aparecía unha nube co xenio da botella, comprobou como a auga desaparecía converténdose nun xel, quedou abraiado co globo indestrutible e gozou coa elaboración do slime, aprendendo a explicación científica que se agocha detrás de cada unha destas experiencias.

Cada grupo non só realizou os experimentos en directo, senón que tamén explicou ao público por que sucedían, empregando unha linguaxe clara, sinxela e adaptada a todas as idades. O alumnado demostrou unha gran capacidade para comunicar ciencia, responder ás preguntas do público e transmitir os seus coñecementos con entusiasmo, seguridade e creatividade.

🧠💬 Ademais dos contidos científicos, o alumnado puxo en práctica habilidades fundamentais como a expresión oral, o traballo en equipo, a organización, a planificación, a resolución de imprevistos e a confianza para falar diante dun auditorio.

💫 O II Show Científico foi todo un éxito e converteuse nun magnífico peche para o Club de Ciencia deste curso. A experiencia permitiunos compartir a nosa paixón pola ciencia coa comunidade educativa e aprender tamén doutras experiencias desenvolvidas por centros da nosa contorna, reforzando a importancia da colaboración, da divulgación científica e da innovación educativa.

Moitas grazas a todas as persoas que nos acompañastes e, moi especialmente, aos centros participantes no VII Congreso EDUCODS por compartir connosco as súas experiencias e facer da ciencia unha auténtica festa da aprendizaxe.

🔬✨ Vémonos no próximo Show Científico!

SESIÓNS ABRIL E MAIO 2026

 

🎤🔬 Preparando o II Show Científico

Nas sesións dos días 28 e 29 de abril e 19 e 20 de maio, no Club de Ciencia dedicámonos a preparar o noso II Show Científico, que presentamos no VII Congreso EDUCODS, un evento no que o noso alumnado se converteu no auténtico protagonista da divulgación científica.

Durante as primeiras sesións comezamos seleccionando os experimentos que formarían parte do espectáculo. Analizamos diferentes propostas, realizamos probas para comprobar o seu funcionamento e escollemos aquelas que resultaban máis sorprendentes, atractivas e adecuadas para explicar conceptos científicos ao público.

Nas sesións de maio chegou o momento de preparar a posta en escena. Elaboramos o guión do espectáculo, repartimos as intervencións, practicamos as explicacións de cada experimento e pensamos na mellor maneira de interactuar co público para facer o show máis dinámico e participativo.

Finalmente, realizamos un ensaio xeral, no que revisamos cada detalle da actuación, avaliamos os logros alcanzados, identificamos aspectos que podiamos mellorar e gañamos confianza antes da presentación final.

Durante toda a preparación do Show Científico, o alumnado organizouse en pequenos grupos cooperativos, responsabilizándose cada un dun experimento diferente. Ademais de aprender ciencia, desenvolveron habilidades de comunicación, expresión oral, organización, traballo en equipo e resolución de problemas, converténdose en auténticos divulgadores científicos.

A continuación, presentamos o traballo realizado por cada un dos grupos e os experimentos que formaron parte do noso II Show Científico.

🟠 Grupo 1: Lámpada de lava

O primeiro grupo presentou a lámpada de lava, un experimento no que descubriron como líquidos con diferentes densidades non se mesturan. Ao engadir unha pastilla efervescente, formáronse burbullas que facían subir e baixar o líquido coloreado, creando un efecto visual espectacular. O alumnado explicou conceptos como a densidade, a inmiscibilidade dos líquidos e a liberación de dióxido de carbono durante a reacción química.

---

🔵 Grupo 2: O xenio da botella e a auga que desaparece

O segundo grupo realizou dous experimentos sorprendentes. No primeiro, O xenio da botella, conseguiron crear unha nube no interior dunha botella, explicando como os cambios de presión fan que o vapor de auga se condense formando pequenas pingas, do mesmo xeito que sucede na atmosfera. A continuación presentaron A auga que desaparece, demostrando como o poliacrilato de sodio é capaz de absorber unha gran cantidade de auga e transformala nun xel, facendo que parecese desaparecer por arte de maxia.

---

🟣 Grupo 3: O globo indestrutible

O terceiro grupo puxo a proba un globo cun experimento que deixou ao público sorprendido. Tras lubricar un pau con aceite vexetal, conseguiron atravesar o globo sen que este rebentase. Explicaron que isto é posible porque o globo se perfora polas zonas onde a goma está menos tensa e o aceite reduce a fricción, evitando que o material se rompa de forma inmediata.

---

🟢 Grupo 4: Slime

O cuarto grupo elaborou slime, un dos experimentos favoritos do alumnado. Mesturando diferentes ingredientes, observaron como se producía unha transformación que daba lugar a un material con propiedades moi curiosas: nin totalmente líquido nin totalmente sólido. Durante a explicación, descubriron que o slime é un fluído non newtoniano, capaz de comportarse de maneira diferente segundo a forza que se lle aplique.

---

Todos os grupos prepararon con moito esforzo as súas explicacións, repartiron as intervencións e ensaiaron as demostracións para que o público puidese comprender o fundamento científico de cada experimento. Grazas ao seu traballo e entusiasmo, o II Show Científico converteuse nun éxito e nunha magnífica oportunidade para compartir a ciencia dunha forma divertida, participativa e sorprendente. 🔬✨

FEBREIRO E MARZO 2026

24 e 25 de febreiro e 24 e 25 de marzo.

A química tamén se cociña!

No Club de Ciencia continuamos descubrindo que a ciencia está presente en todas as partes... incluso na cociña. Nestas sesións mergullámonos no apaixonante mundo da química e aprendemos que cada vez que mesturamos, quentamos ou arrefriamos os alimentos se producen cambios que podemos explicar grazas á ciencia.

Comezamos coñecendo que é a química e descubrindo que está presente en moitas das accións que realizamos a diario. Observamos exemplos tan cotiáns como un ovo que pasa de líquido a sólido ao cocelo, a xelatina que endurece ao arrefriarse, a masa do pan que medra grazas ao lévedo ou un xeado que se solidifica co frío. Así comprendemos que a química forma parte da nosa vida moito máis do que imaxinabamos.

A continuación achegámonos á cociña molecular, unha disciplina que combina ciencia e gastronomía para crear pratos sorprendentes con novas texturas, formas e presentacións. Descubrimos como os cociñeiros empregan o coñecemento científico para innovar e sorprender aos comensais, convertendo a cociña nun auténtico laboratorio.

Chegou entón o momento de experimentar. O alumnado participou en retos de cociña molecular elaborando unha pequena degustación . Mediante a técnica da esferificación, utilizando alxinato de sodio e lactato cálcico, conseguimos crear pequenas esferas líquidas que sorprenderon a todos pola súa textura e aspecto, comprobando como a ciencia pode transformarse nunha experiencia gastronómica divertida e fascinante.

Nas sesións que realizamos o 24 e 25 de febreiro contamos, ademais, cuns convidados moi especiais. Recibimos a visita de profesorado procedente de Madrid, Sevilla e Asturias, participantes no programa de Agrupacións Escolares, que puideron coñecer de primeira man o traballo desenvolvido no noso Club de Ciencia e participar activamente na experiencia de cociña molecular. A súa presenza converteu a actividade nunha magnífica oportunidade para intercambiar experiencias educativas, compartir boas prácticas e amosar como a ciencia é unha excelente ferramenta para aprender de forma cooperativa e creativa.

Foron  sesións  cheas de curiosidade, experimentación e aprendizaxe, na que comprobamos que a química non só está nos laboratorios, senón tamén nas nosas cociñas. Unha vez máis, o Club de Ciencia demostrou que aprender facendo é a mellor maneira de espertar a curiosidade científica e de converter cada experimento nunha nova aventura. 🔬👨‍🍳🍴

XANEIRO 2026

 Nas sesións do 28 e 29 de xaneiro construímos un elevador hidráulico e descubrimos a forza da auga

No Club de Ciencia, convertémonos en auténticos enxeñeiros e enxeñeiras para descubrir como funcionan algunhas das máquinas que vemos no noso día a día. Nesta ocasión investigamos que é un elevador hidráulico, aprendendo que as máquinas hidráulicas utilizan un líquido, como a auga ou o aceite, para transmitir a forza. Tamén coñecemos numerosos exemplos, como os camións do lixo, as escavadoras, as grúas, os gatos para levantar coches, as camas de hospital ou os sillóns de dentista.

Despois da parte teórica chegou o momento máis emocionante: construír o noso propio elevador hidráulico. Empregando cartón, xeringas, tubos e auga, seguimos paso a paso o proceso de montaxe ata conseguir que o mecanismo funcionase correctamente. Foi un reto no que puxemos en práctica a precisión, a paciencia e o traballo en equipo.

Ao encher os tubos de auga e conectar as xeringas, comprobamos como, ao empurrar unha delas, a outra se movía elevando a plataforma. Así entendemos de forma práctica o Principio de Pascal, que explica que a presión exercida sobre un líquido transmítese por igual a todos os puntos, permitindo multiplicar a forza.

Foi unha sesión chea de aprendizaxes, na que descubrimos que a ciencia tamén está presente nas máquinas que usamos todos os días e que, con materiais sinxelos e moita curiosidade, podemos construír inventos sorprendentes. 🚗💧🔬

SESIÓNS NOVEMBRO E DECEMBRO 2025

 O Club de Ciencia pon a proba os nosos ollos… e o noso cerebro!

Os días 23 e 24 de novembro e o 16 e 17 de novembro, o alumnado do Club de Ciencia mergullouse no fascinante mundo das ilusións ópticas, descubrindo que non sempre vemos a realidade tal e como é. A través de diferentes retos e experimentos comprobamos que os nosos ollos captan a información, pero é o cerebro quen a interpreta, podendo chegar a enganarnos.

Comezamos coñecendo o funcionamento do ollo humano e comprendendo como a luz chega á retina para ser procesada polo cerebro. A continuación analizamos algunhas das ilusións ópticas máis coñecidas, como a ilusión de Ponzo, a grella de Hermann, o triángulo de Penrose ou o xerro de Rubin, descubrindo por que percibimos tamaños, formas e figuras que en realidade non existen.

Durante as sesións tamén reflexionamos sobre a importancia da percepción cerebral, entendendo que o cerebro interpreta constantemente a información visual empregando patróns e experiencias previas, o que explica moitas das ilusións que observamos.

Para rematar, convertémonos en auténticos creadores de ilusións ópticas. Experimentamos con diferentes propostas, resolvemos desafíos visuais, descubrimos o coñecido "truco da tableta de chocolate" e incluso debuxamos un buraco en tres dimensións, poñendo en práctica técnicas de perspectiva que sorprenderon a todos e todas.

Unha vez máis, comprobamos que a ciencia tamén nos invita a cuestionar o que vemos e a entender mellor como funcionan os nosos sentidos.Sesións cheas de curiosidade, sorpresa e moitas ganas de seguir investigando. 🔬🧠👁️

SESIÓNS OUTUBRO 2025

 

O Club de Ciencia despega cunha misión moi especial: "Voo perfecto"

Os días 29 e 30 de outubro puxemos en marcha unha nova edición do Club de Ciencia do CEIP Plurilingüe Nº1 de Tui. Para inaugurar este novo curso convertémonos en auténticos enxeñeiros e enxeñeiras aeronáuticas coa misión "Voo perfecto", descubrindo os segredos que permiten aos avións voar.

Comezamos investigando o poder do aire mediante pequenos experimentos. Observamos como o aire en movemento pode cambiar a presión e coñecemos o efecto Bernoulli, comprendendo por que as ás dos avións son capaces de xerar sustentación.

Despois chegou o momento de poñer en práctica todo o aprendido. Cada participante construíu tres modelos diferentes de avión de papel (planeador, rápido e estable) e realizou probas para analizar cal voaba máis lonxe, permanecía máis tempo no aire ou mantiña un voo máis recto. Medimos, comparamos resultados e extraemos conclusións sobre como inflúen as ás, a punta ou o peso no comportamento de cada avión.

Para rematar, o alumnado afrontou un desafío cooperativo: deseñar un novo modelo de avión capaz de voar o máis lonxe e recto posible, aplicando todos os coñecementos adquiridos. Cada equipo presentou o seu deseño, explicou as decisións tomadas e puxo a proba a súa creación nun emocionante reto final.

Foi un comezo de curso cheo de curiosidade, experimentación e aprendizaxe, no que descubrimos que a ciencia está presente en cada voo e que investigar tamén pode ser moi divertido.

 

SHOW CIENTÍFICO NO V CONGRESO EDUCODS. 3 DE XUÑO 2025

 🎉🔬 O noso I Show Científico: ciencia en directo para toda a comunidade educativa

O pasado 4 de xuño ás 17:30 da tarde, na Sala Camilo José Cela de Tui, celebramos con moita ilusión o primeiro Show Científico do noso Club de Ciencia. Foi unha ocasión moi especial na que invitamos a toda a comunidade educativa —familias, profesorado e compañeiros— a gozar, sorprenderse e aprender coa ciencia feita polo propio alumnado.

Durante o espectáculo, os diferentes grupos foron presentando os seus experimentos de forma clara, divertida e moi visual. Houbo momentos de asombro, risas e moitos "ooooh!" cando:

• Se camiñou sobre ovos sen rompelos.

• Se creou un arco da vella químico usando col morada.

• Se buscaron amidóns agochados en alimentos do día a día.

• A escuridade se encheu de luz cun bote de fluorescencia brillante.

Cada grupo non só fixo o experimento en directo, senón que tamén explicou como funciona, por que sucede e que aprendemos con el. Foi unha mostra de que o alumnado pode ser protagonista da súa aprendizaxe, comunicando ciencia con entusiasmo, responsabilidade e moita creatividade.

🧠💬 Ademais dos contidos científicos, puxemos en práctica habilidades como falar en público, traballar en equipo, organizar un guión, resolver imprevistos e, sobre todo, disfrutar compartindo o coñecemento.

💫 Foi unha experiencia xenial, que non esqueceremos, e que marca o comezo dunha nova etapa para o noso club: unha ciencia viva, participativa e aberta a toda a comunidade.

Moitas grazas a todas as persoas que nos acompañaron e animaron!
¡Esperámosvos no próximo Show Científico!